القضية الشركسية، الحقوق الشركسية، لمن نشرحها و ممن نطلب المساعدة؟

وصلتنا المساهمة التالية من عضو مشارك في الموقع 


القضية الشركسية، الحقوق الشركسية، لمن نشرحها و ممن نطلب المساعدة؟
أميركا؟
لااا أعوذ بالله! هؤلاء الأمريكان فقط بدهم يكونوا القوة الوحيدة بالعالم مشان هيك رح يوقفوا ضد روسيا ويستغلونا!!!
طيب بلاش.

بريطانيا؟
لااا شو بريطانيا! اصلاً كانت هي سبب في الكارثة اللي أصابت الشركس!!
ماشي خلص.

الاتحاد الأوروبي؟
لااا شو الاتحاد الأوروبي!! هدول الدول الغربية كلها تابعة لأمريكا و بتمشي سياساتها!!
اوكي كمان بلاش.

جورجيا؟
لااا شو جورجيا!! هدول حاربونا و قتلونا
(مع انهم كانوا تحت الاحتلال الروسي كمان وقتها بس ماعلينا)
و بعدين ابخازيا والابخاز والابخازيين بزعلوا علينا!
لا استغفر الله كله ولا زعلهم هذا الكفر بعينه.

اوكرانيا؟
لااا شو اوكرانيا!! اصلاً هدول اميركا ضحكت عليهم و خلتهم يحاربوا روسيا!
(مع انه روسيا اللي فاتت عليهم و احتلتهم قدام كل العالم)!
بلاش كمان.

تركيا؟
لاااا شو تركيا !! اصلاً تركيا هي اللي ضحكت عالشركس و خلتهم يطلعوا من بلادهم بحجة الدين!
انسى تركيا كمان.

أرمينيا؟
لااا شو أرمينيا هدول نصارى!! استغفر الله بعدين هدول عايشين باراضينا في القفقاس وعم يزيدوا و بعملوا قوة هناك!!
(مش روسيا يعني اللي بتسهل اقامتهم و توطينهم في أراضينا؟)
اه بلاش كمان هدول.

اسرائيل؟ لا بمزح! من عندي لغيتها خلص خلص  😅

وفوق كل هاد بطلعولك بسواليف انه جورجيا و تركيا و اوكرانيا و ارمينيا و بولندا واي دولة يتخطر على بالك ممكن الصومال كمان اذا بتصف ضد روسيا حبيبتهم، خارطتها الكبرى التوسعية الاستعمارية تحتوي على شركيسيا 😈

طيب ما هي روسيا هلأ الآن محتلة شركيسيا يا اخوان!!!!!!خلينا نحررها اول بعدين نقاطع كل هدول الدول ونخرّب مخططاتهم الشريرة… ولا بلاش نحررها و نحلم حلم شوي بعيد، خليهم الروس يسمحولنا بس نزورها لما بدنا 🥲

كل هاد بناقشوا فيه وبحللوه تحليل استراتيجي تكتيكي حربي أمني، إذا و بلكي و يمكن و بجوز….. بس ما بحكوا الاشي الوحيد الصحيح والواضح والأولى انهم يحكوه، انه روسيا هي السبب والمسبب الأول والأخير و هي المسؤولة الاولى عن ما جرى للشركس من ويلات، و عن ما يجب عليها فعله من اعتراف و تعويض و حق تقرير المصير للشركس.

وفرضاً انه روسيا احسن واحن دولة بالعالم ومافي متلها في العدل وبحقوق الانسان و شو ما بدك….ما زالت هي اللي ذبحتنا و هجرتنا وشردتنا!!! هي الملام والمسؤول الاول والاخير!!

و من حق الشركس شرح قضيتهم و طلب المساعدة من كل دول العالم، و اذا كانت هاي الدول اصلاً ضد روسيا بكون احسن واحسن على فكرة!!!😃

يعني بلفوا كل هاللفة بس عشان يدافعوا عن روسيا بشكل مستميت و غريب!!

ما هو الدافع لهذا القتال لصالح من ذبح أجدادك؟؟؟

اذا كنت تخاف منهم وتهابهم و لك مصالح معهم، على الأقل التزم الصمت ولا تحارب من يطالب بحقوقنا المشروعة! فقط من اجل كرامة اجدادك الذين أُلقي بهم في البحر وأصبحوا طعاماً للأسماك!!

يعني اللي ضل انه الواحد يحكي لحاله و مع حاله قدام المراية “شركيسيا حرة” يطلعله جنّي ذنب لروسيا يهاجمه و يحكيله لأ هاي أمريكا و جورجيا و اوكرانيا و تركيا بدهم يضحكوا عليك و يستغلوك 😈😐 ومش بعيد كمان يهاجمك عالفيسبوك 😉

شركسي مطّلع ومتفائل سابق

Share Button

اترك تعليقاً